(Per leggere l’articolo in italiano cliccare sulla bandierina in alto)

Sa tzitade non podet èssere de sos pitzinnos ebbia, ma depet èssere fintzas de sos pitzinnos e non de sos mannos ebbia.

Como b’at unu progetu chi punnat a promòvere sa partetzipatzione de sos pitzinnos a sa vida sotziale, culturale e amministrativa de sa tzitade, ponende in contu, in fines, sas esigèntzias issoro e dendeˑlis sa possibilidade de bogare a campu propostas e cunsìgios.

Cherimus propònnere sa costitutzione de una retza tzitadina de bighinados a mesura de pitzinnu, e amus a cramare, pro nde fàghere parte, totu sos entes e sos sugetos interessados (istitutziones, iscolas, famìlias, assòtzios, tzentros de aggregatzione). Su modellu de riferimentu est su chi cunsìgiat s’Istitutu de Sièntzias e Tecnologias de sa Cognitzione de su CNR, chi dae pagos annos at istituidu su Progetu Internatzionale “La città dei bambini” (www.cittadeibambini.org) chi su Cunsìgiu de sos pitzinnos nde rapresentat una de sas atividades prus de importu.

Cun custas premissas ant incaminadu in su 2015, pro more de “Cagliari capitale della Cultura 2015”, su Cunsìgiu de sas pitzinnas e de sos pitzinnos de Casteddu, formadu dae 28 membros chi benint dae sas cuartas e cuintas de sas iscolas primàrias de sa tzitade e cun s’agiudu pretziosu de sa Comuna.

Sos cunsigeris los ant nominados a sorte in sas iscolas aderentes e rapresentant totu sos pitzinnos, mancari chi sas classes interessadas siant petzi sas cuartas e sas cuintas. Pro su chi pertocat su rolu de sos pitznnos in intro de su Cunsìgiu, su modellu no istrochet su de sos mannos e non previdet s’eletzione de su Sìndigu e de sos Assessores, ma cunsìderat totu sos pitzinnos comente cunsigeris, sena distintzione peruna.

Su Cunsìgiu de sos pitzinnos est formadu pro medade dae pitzinnas e pro medade dae pitzinnos; l’ant formadu su 14 de nadale de su 2015 in s’Àula Cunsiliare; fiant presentes su Sìndigu Massimo Zedda e sa chi tando fiat Assessora Enrica Puggioni.

Su progetu, in prus, at incaminadu un’àtera atividade pilota: sos prus minores los ant interessados in sa progetatzione e in sa realizatzione de una parte de sa corte de su “Nido d’infanzia Comunale Il mondo dei piccoli” (bighinadu CEP).

Su Progetu leat sas LÌNIAS DE INDIRITZU PRO SA REALIZATZIONE DE SU PROGETU “CAGLIARI CITTÀ AMICA DELLE BAMBINE E DEI BAMBINI” aprovadas a s’unanimidade dae su Cunsìgiu Comunale de Casteddu su 6 de maju de su 2014, a proposta de sos Cunsigeris Francesca Ghirra, Guido Portoghese, Filippo Petrucci, Sebastiano Dessì e Sergio Mascia.

Como semus collaborende cun s’Amministratzione pro creare una sinergia intre finantziamentu privadu e pùblicu chi asseguret s’agiudu chi bi cheret a su progetu chi, pro sa natura sua, tenet una durada longa. Custa de “Aviva Community Fund” est una de sas possibilidades chi sa “Cooperativa Teatro del Sale” de Casteddu est sighende; mancari siemus in su de 7 postos, de 189 progetos presentados in totu su territòriu de s’Istadu in sa categoria “In campo per l’infanzia e per i giovani” pro 15.000 èuros de finantziamentu, forsis non bi l’amus a fàghere a lòmpere a sa finale.

Ma semus cuntentos a beru de sa cundivisione chi su progetu tenet in Casteddu e in medas àteras logos de Sardigna. Mustrat chi est lòmpidu su tempus chi sos tzitadinos minores sunt interessados semper de prus in sa progetatzione partetzipada de sos tzentros abitados nostros.

Su Cunsìgiu de sas pitzinnas e pitzinnos de Casteddu est faghende cun seriedade su traballu suo, siat rapresentende mìgias de pitzinnos collegas issoro, siat cuidende sas propostas de progetu, in mamentos de cunfrontu cun s’amministratzione chi sunt istados illuminantes a beru cun sas pregontas issoro, in su de focalizare una visione de sa tzitade chi siat prus sustenìbile pro totus, e non pro issos ebbia.

Su progetu lu ghiant: Maurizio Murino (Diretore sientìficu), sotziòlogu, espertu de ideatzione, organizatzione e coordinamentu de progetos, atividades e initziativas in su setore infàntzia e adulescèntzia, cun riferimentu particulare a sa promotzione de sos deretos de sos pitzinnos e a su raportu tzitade-infàntzia; Aurora Simeone (Diretora artìstica), atora e operadora culturale professionista ativa dae su 1994, organizadora teatrale e fundadora de su “Teatro del Sale” ; Francesca Caldara (Diretora organizativa), organizadora de su “Teatro del Sale”; e, in prus, b’at architetos, urbanistas, artistas e educadores professionistas.

Unu finantziamentu nou de Aviva nos diat permìtere de mandare a dae in antis custu percursu giai incaminadu, e a sa progettazione partetzipada amus a agiùnghere unu percursu de valorizatzione de su traballu fatu dae totu sos partetzipantes, respetende sa tutela de sas imàgines de sos pitzinnos, cun s’impreu de vìdeos e de sas retzas sotziales, profetosos non solu pro sa realizatzione de unu documentu de cundivisione de su traballu fatu, ma fintzas comemte mèdiu de “valutatzione” e verìfica de sos resurtados.

S’idea est de sighire a dare boghe a su Cunsìgiu de sas ptzinnas e de sos pitzinnos de Casteddu chi s’at a reunire cada mese pro rapresentare sas esigèntzias de sos pitzinnos de sa tzitade. In prus, diamus pòdere cugugiare sos gastos organizativos, logìsticos e de sos professionistas interessados pro pòdere cumintzare àteras atividades de interventu architetònicu, artìsticu, sotziale e in sas iscolas, movende dae cussas emblemàaticas e multiètnicas, comente sas chi sunt in su coro de sa tzitade.

S’Apellu
Per votare bastant 2 minutos, un’elaboradore personale (o una tauledda, o unu telefoneddu intelligente) e una connessione! Si podet votare dae totu s’Itàlia e cada pessone podet dare fintzas 10 votos!
Vota e faghe votare in su ligàmene inoghe suta fintzas a sas oras 18.00 de su 30 de martzu de su 2017
https://community-fund-italia.aviva.com/voting/progetto/schedaprogetto/16-887
Si as a resessire a nos dedicare 10 minutos a sa die de su tempus pretziosu tuo pro sa difusione e cumpartzimentu màssimu de su ligàmene e de su progetu, as a donare a nois e a totu sos tzitadinos de Casteddu un’oportunidade manna! Semus a disponimentu pro ti dare su materiale promotzionale e su ligàmene in Facebook, Twitter e WhatsApp. Sighit una presentatzione curtza de su progetu.

Gràtzias pro su cuntributu tuo fundamentale!!
Pro custu ti pedimus de votare e fàghere votare, tenimus bisòngiu de sa Retza e de s’agiudu de totus pro lòmpere a sa finale cun mìgias e mìgias de votos pro mustrare sas potentzialidades importantes chi custu progetu tenet, ca una Tzitade a mesura de pitzinnu est una tziatade a mesura de totus!

Si ses un’insinnante, unu babbu o una mama, unu giaju o petzi unu tzitadinu interessadu…e nos cheres invitare a contare su progetu in sa classe tua o in su grupu o assòtziu chi nde faghes parte, cramaˑnos!