(Per leggere la versione in italiano cliccare sulla bandierina in alto)

Oe e cras, dae sas 10 in artu, s’adòbiu cun sa rassinna de sos Sapores antigos est in su THotel de Casteddu pro una finitia de chida intregada a sa traditzione enogastronòmica sarda.
Sos protagonistas de custas dies ant a èssere torra sas licanzias de àteros tempos, sapores ismentigados e traditziones antigas de sas fainas ligadas a su pane, sa pasta, sos durches e galu àteru. Est una parte minore de su patrimòniu gastronòmicu sardu chi arriscat de iscumpàrrere.
Su cumbidu a leare parte a custa die est pro totus, produidores, chef, restoradores, consumadores, giornalistas e gourmet. “ Est fintzas una manera pro torrare a iscopèrrere unu ischire antigu chi totus amus su dovere de costoire e tramandare” narat Gilberto Arru, ammaniadore de s’eventu impare a s’Assòtziu Stelle del Sud Onlus e su THotel de Casteddu.
Duas dies prenas de eventos; dae sos atastos lìberos e ghiados, a sa mustra de sa faghidura de unos panes e de su fermentàrgiu, ma mescamente su tema de custa editzione at a èssere: ”Sos durches de Sardigna”. Espositziones e ammustras de un’arte tramandada dae redòrios, intregada a fèminas istraordinàrias.
S’at a faeddare fintzas de abbaloramentu de produtos tìpicos, de comente fàghere connòschere custas particularidades e de comente nche las esportare a in foras de sas lacanas de su logu. Ant a èssere presentados duos libros, Guida Vini Buoni d’Italia 2017, chi regollit totu su mègius de sa produtzione italiana, ma ebbia cussa de sas bides de sos logos, at a èssere presente su contivigiadore Mario Busso, e “Il segreto dell’olio di lentisco” de Sergio Mei chi at a aprontare unos cantos màndigos cun custu ogiu raru e pretziadu.
Unu momentu particulare, cun atastos ghiados, at a èssere intregadu a su Cagnulari: unu binu chi est semper prus pretziadu e no intames in Sardigna. Si cunfirmat torra sa Gara gastronòmica, reservada a sos amantiosos pro ammentare una grandu restoradora, Rita Denza chi pro prus de 50 annos at tentu arta sa pandela de sa restoratzione in Sardigna. A issa at a èssere intregadu su “Piatto della Tradizione” .
Su balàngiu de sas duas dies at a èssere donadu a s’Assòtziu Stelle del Sud, pro cumprire sos progetos giai incaminados in Orangea unu biddigiolu in su Madagascar.
Su pràndiu e sa chena de sa die 25 e su Brunch de sa die 26 de martzu in su THotel ( tocat a prenotare in su 070 47400 o bistrot@thotel.it), ant a èssere intregados a su abbaloramentu de sos sapores antigos propònnidos sighende sas retzetas antigas.
Pro info tel. A su 339.7150760 | Pro prenotatziones a su pràndiu THotel 07047400 | bistrot@thotel.it