(Per leggere l’articolo in italiano cliccare sulla bandierina in alto)

Senadore Floris istimadu, li iscrio in mèritu a s’interrogatzione parlamentare urgente, de sa cale est peri firmatàriu. Est comente chi lu sia bidende s’ispantu suo cando at a retzire custa lìtera mea, ma li iscrio che sardu a sardu, ca so curiosu a beru de cumprèndere una paja de chistiones.
No iscrio a sos àteros senadores ca no arribant dae custa terra e duncas leghent sos fatos acapiados a sa Sardigna cun chilivros esternos, giustos o isballiados chi siant.
Però mi ispantat chi unu sardu, pròpiu unu fìgiu de Sardigna, apat pòdidu sutascrìere un’interrogatzione che pare. Si mi lu permitit, in curtzu, l’acraro pro ite.
Sa faina chi apo àpidu su praghere de coordinare faghiat parte de unu progetu prus ampru dedicadu a sa “Die de sa sa Sardigna” e chi previdet addòbios subra de chistiones de atualidade, cultura e istòria in relata a sa Sardigna.
Pro ite pedit de suspèndere sos àteros atopos prevìdidos subra de custos argumentos? Non la cunsiderat cosa pretzisa chi in sas iscola sardas si faeddet de s’istòria de sa Sardigna chi si costumat a disconnòschere in nùmene de s’acumprimentu de su Programma (cussu cun sa P manna)?
Comente maistru de istòria e letore tosturrudu de s’istoriografia de sos Annales credo chi siat isballiadu meda a imparare s’istòria istichende s’idea chi issa siat colada aterue e indedda meda dae sa Sardigna. Pro esperièntzia li potzo nàrrere finas chi sos pitzinnos si nche ischidant dae s’ingalenada libresca cando lis chistionamus de su Nuraghe, de sa crèsia giuigale o bizantina e de fatos de importu capitados a pagu tretu dae domo issoro.
Est unu printzìpiu a fundamentu de sa didàtica cussu de mòere dae su bighinadu pro si interessare a su generale, pròpiu non cumprendo pro ite lu depimus dispretziare. Antzis mi diat fàghere praghere si su 31 de martzu imbeniente diat bènnere a nos visitare a iscola pro bìdere comente traballamus e cales resurtados acumprimus in una terra chi est sa prima pro disperdìtziu iscolàsticu.
Como li dia chèrrere allegare de s’addòbiu subra de su demàniu militare, ogetu de s’interrogatzione sua. A l’ischit chi de una chentina de istudiantes presentes petzi pagos ischiant de sa presèntzia de sos polìgonos in Sardigna? Normale li paret? Dae sa Polìtica (peri cussa cun sa P manna) mi isetaia prus un’interrogatzione supra de custu fatu, est a nàrrere subra su proite mìgias de tzitadinos sardos non connoschent unu fatu istòricu, econòmicu, sotziale, polìticu de importu mannu.
In su pagu chi potzo, cun su progetu “Sa die de sa Sardigna”, apo chircadu de aporrire a sos pitzinnos nostros sos elementos pro si formare una cussèntzia tzìvica pròpia a manera echilibrada e democràtica. In s’interrogatzione decrarades chi non bi fiat dibata e nemos intre sos reladores chi podiat “sustènnere sas resones de sa presèntzia de custas bases e polìgonos in su territòriu de sa Sardigna”.
Mi permito de cuntestare chi custu no est giustu ca s’on. Scanu at faeddadu a manera crara de sa netzessidade de fàghere andare a manu tenta s’art. 11 de sa Costitutzione Italiana, “S’Itàlia ripùdiat sa gherra”, cun sa netzessidade de defensare sa pàtria. Est a beru, sa militàntzia mea indipendentista si connoschet, ma dadu chi in cussa sea deo fatzo su traballu meu e fia moderadore de sa dibata, no apo naradu sa mea e mancu apo rispostu a s’on. Scanu pròpiu ca apo semper pesadu unu muru tèteru e malu a barigare intre sa vida polìtica e sa professionalidade mea.
A bortas finas peri fora de mesura ca, pro nàrrere, cando mi so candidadu e cando su votu meu est istadu mentovadu in sos giornales pro carchi vertèntzia, non nd’apo mai faeddadu in iscola e apo semper ischertadu cuntestos esternos pro nde chistionare.
De custu sunt testimòngios totu sos Dirigentes e totu sos collegas cun sos cales apo traballadu e totu sos istudiantes chi apo tentu, e l’asseguro chi bi nd’at medas de dereta e de ultra dereta.
Tanco custa lìtera pròpiu cun custu, ca m’est dòrfidu a bìdere su nùmene meu agutiperadu in pùblicu comente “esponente de s’indipendentismu sardu” chi ispàrghinat “messàgios contra de sas istitutziones, cun tesi mandadas a in antis dae comitados ispontàneos, separatistas o antimilitaristas”. In cussa sea deo so semper istadu e apo a èssere semper un’educadore e un’agente de cultura e custu non pro rispetu de sa lege o pro non pèrdere su postu de traballu meu, ma prima de totu ca creo sena duda peruna in su valore democràticu de s’istitutzione iscola. Valore chi so prontu a defensare a petorra parada in cada ocasione.