(Per leggere l’articolo in italiano cliccare sulla bandierina in alto)

Su 24 de freàrgiu de su 1996 si nch’est mortu Angelo Caria, una de sas ghias prus de importu de su movimentu indipendentista sardu, su chi aìat fundadu “Sardigna Natzione”. Teniat petzi barantoto annos, e una vida colada ponende infatu a un’ideale. Unu polìticu chi non b’intraiat nudda cun àteros medas, chi chircant sos sardos petzi cando lis bisòngiat su votu.

Issu pensaiat a fàghere crèschere s’autovalorizatzione de sos sardos, chi si depet isvilupare dae sa connoschèntzia de un’istòria rica cantu disconnota, e dae sa cussèntzia de sas potentzialidades mannas de sa terra nostra. Ma est una pelea a liberare sas pessones dae sa dipendèntzia psicològica dae sos modellos coloniales. Est una gherra a cunchistare, comente naraiat issu, bìculos de indipendèntzia in logu nostru.

S’annu in antis de sa morte de Angelo Caria, su movimentu chi issu aìat fatu nàschere fiat andende e creschende. In su giru de pagos meses, Sardigna Natzione aìat ammaniadu una manifestatzione in Agrustos contra a sos istràngios chi cherent cumandare in sas marinas nostras, una caminada pro su traballu, s’ambiente, sa cultura – chi sos militantes natzionalistas fiant colados in biddas e tzitades medas de Sardigna e fiant lòmpidos a Casteddu, in ue aìant faeddadu cun su presidente de sa Regione Palomba – , un’addoviu internatzionale in Nùgoro in ue sos sardos si fiant cunfrontados cun sos esponentes de sas minorias de Itàlia e de Europa. E sa gente fiat cuntenta de iscobèrrere una manera noa de fàghere polìtica, fata de ideales ma fintzas de progetos,istudiende sa realidade cun contivìgiu, pro las pòdere cambiare a beru sas cosas. Ma, a dolu mannu, Angelo Caria no at pòdidu andare a dae in antis.

Ite podimus nàrrere, in contu de polìtica, a pustis de prus de 20 annos? De seguru, cun sa derrota de su referendum costitutzionale e sa crisi de su partidu de majoria relativa, ant pèrdidu fortza sas punnas atzentradoras chi si fiant leende semper prus logu. In Sardigna, amus a bìdere si s’at cumprèndere a beru su valore de s’unidade, chi depet èssere su frutu lòmpidu de una sìntesi de teoria e prassi, ponende a un’ala personalismos e liderismos. Cun un’idea ebbia: su venidore est in manos nostras.

https://it.wikipedia.org/wiki/Angelo_Caria