(Per leggere l’articolo in italiano cliccare sulla bandierina in alto)

Ite b’at de prus bellu de essire a campu in paris a (a su mancu) milli àteras persones mustrende s’istima pro sa terra nostra? Su chi nos proponimus est de acumprire totus in paris custu bisu su 28 de abrile benidore, in ocasione de s’editzione de ocannu de sa die de sa Sardigna.

Custa idea dd’amus àpida calicuna chida a oe, castiende is immàgines e is videos de sa marea umana de catalanos chi in ocasione de sa festa natzionale cosa issoro, sa Diada, si fiant adobiados in is ramblas de Bartzellona bentulende cun orgòlliu is colores ruju e grogu de s’istendardu issoro.

Nos semus luego pregontados si nois esseremus de mancu e sa risposta chi nos aìamus donadu fiat chi nono, antzis! Est pro custu chi nos diat agradare a cumpartzire s’initziativa de Sa Die cun su prus grandu nùmeru de persones possìbile. Diat èssere difatis sa prima bia, podet èssere a pustis de sèculos, chi a su mancu milli sardos manifestant totus in paris, cun cuntentesa, simpremente s’orgòlliu de apartenèntzia a sa pàtria minore comuna.

Ddu cherimus fàghere pro mèdiu de su sìmbulu cosa sua prus amadu, chi est su matessi chi nos identìficat de manera universale in cale si siat parte de su mundu nos agatamus, fintzas prus de sa limba: sa bandera de is bator moros. Bos cumbidamus giai dae immoe a dda buscare, cumbidende 10 de is amigos bostros a fàghere sa matessi cosa.

Nos amus a addobiare totus in paris pro Sa Die in Casteddu (su logu dd’amus a istabilire a pustis) e in Tàtari in pratza de Itàlia pro iscrìere totus in paris una pàgina de istòria noa.

p.s. Totus is agiornamentos in sa pàgina de Facebook “1000 banderas pro sa Sardigna”.