(Per leggere l’intervento in italiano cliccare sulla bandierina in alto)

Ramazzotti istimadu,
non b’at surdu peus de su chi non cheret intèndere. Acraro su pro ite.

No apo pesadu chistiones subra su chi s’est fatu pro sa retza ìdrica sarda, finas dae Vostè, comente apo iscritu in una lìtera personale in contu de sa cale apo a torrare a pustis.

Su cummentu meu aiat duas punnas: sa prima est a sinnalare a chie disponet chi Abbanoa si refudat de acrarire a s’utente, segundu su cumportamentu clàssicu de su monopolista aragone; su segundu est a pedire s’interventu de sos òrganos de bardiania pro pònnere mèdiu a custu dissèrvìtziu e, si custos sunt latitantes, pedire a sa Magistradura a lù fàghere issa, intzertende e adduende cun custu a s’arrennegu de sa popolatzione pro custas fainas.

Nde leo atu de s’espositzione de sas resèssidas acumpridas dae sa gestione sua e torro a nàrrere, pro un’àtera borta, sos contenutos de sa chesciada mia, lassende a banda detàllios medas chi sunt infadosos pro non cascaviare su letore. S’intentu meu est a pesare unu problema generale subra una chistione de gestione de sa cale Vostè in persone, mancari siat impitzadu in àteras peleas che a s’Etzellèntzia de sos Giustos, at mustradu pagu aficu finas cun maneras crispas (si podet bìdere finas sa lìtera sua de resposta de sa cale apo a faeddare a sa fine).

In su periodu 2013-14 apo retzidu duas cartelas macas chi mi ghetaiant a pagare in duos meses de permanèntzia in Sardigna belle e milli de metros cubos de abba, e chi posca sunt crèschidas pro sos interesses additzionales.

Sende chi so in sa categoria de sos “pensionados fideles e rigorosos” (apo àteras utèntzias chi sunt regulares) e non de sos “professionistas, vilàgios de bagàntzias e àteras atividades” chi la faghent arrennegare, apo chircadu de cumprèndere, apubende a s’inghitzu a una pèrdida minore de abba chi aiat àpidu, una càusa dàbbile chi aia però acontzadu in deretura.

Sende chi su consumu-faturatzione anòmalu aiat sighidu, apo comintzadu una pràtica longa pro pedire un’averguadura de su contadore bostru, mesches cando deo fia in Sardigna in s’istade. Su silentziu totale in contu de sa rechesta mia e sas pediduras pro avantzare recursos formales de acordu, semper refudados.

Sighint però a arribare sas ghetaduras a pagare, sena respòndere a sas pregontas mias de averguare su contadore; detzido tando de bi pònnere unu contadore meu internu e de custu bos apo dadu comunicatzione.

A belle abatadu, sos consumos anòmalos si firmant sena perunu cummentu dae bois e totu. Pretziso chi, fora de sos consumos anòmalos, aia sighidu a pagare sas faturas normales. In su mese de Nadale arribat un’òrdine de pagamentu, sena perunu mentovu de sa documentatzione chi aia presentadu. Detzido de pagare cun riserva a fines de non mi imbordulare in una càusa de giustìtzia assimètrica, in ue Vostè gastat su chi cheret e deo non mi lu potzo permìtere.

Custa est sa segunda chistione de su monopolista aragone a su cale si depet pònnere frenu o dae banda sua o dae sas autoridades.

Acabadu? Ello?! Pustis chi apo pagadu mi ghetant a pagare torra cun una rechesta a duas pìgios: sa prima, cuntènnida in 38 boghes sena giustificatzione, pro 773,36 èuros de interessos de mora pro pagamentos trigados chi pertocaiant su periodu de pretu; sa segunda pro una fatura forsis non pagada (gasi est iscritu) pro 737,88 èuros.

Apo pedidu informatziones imbiende duas lìteras eletrònicas chi, comente a parusu, no ant àpidu resposta; apo dadu incàrrigu a unu legale de andare a sos ufìtzios de Aristanis pro àere acrarimentos, ma sos ufìtzios ant respostu chi non los ant. Apo pagadu pro su seguru chi depo e pro su chi apo consumadu, isetende de retzire acrarimentos pro su restu. Penso chi custu siat sinnu de un’àteru incàrrigu bostru a unu legale pro torrare a cuberare su crèditu sena mi dare sas informatziones bastantes, comente semper ais fatu.

Mi lompo a sa lìtera chi aia iscritu a Vostè su 23 cabudanni de su 2014 acrarende sos motivos de sas rechestas mias, preghende de pònnere in campu una verìfica de su contadore e proponende de serrare sa pràtica cun unu abatu. Vostè, comente chi mai, aiat ignoradu sa sustàntzia e m’aiat respostu chi non podiat “cuntzèndere unu rebassu”.

Penso chi su balentosu Muroni at a ischire a agatare in sardu sa paràula cunforme pro definire su significu de sa resposta, chi at sos matessi piessinos de sa “precisazione” posta in su giassu de Abbanoa in contu de s’invitu chi apo inderetzadu a fines de truncare su tràgiu de su monopolista aragone.
Vostè at su dovere de garantire sas informatzione pro reclamare su dèpidu. Si non l’at a fàghere, provedant sos òrganos de controllu o sa Giustìtzia.