(Per leggere l’articolo in italiano cliccare sulla bandierina in alto)

Su risultadu de su referendum ponet in seguresa sa subravivèntzia de sos entes territoriales prevèdidos dae sa Costitutzione e postos in arriscu dae una campagna populista chi no at produidu aorros, ma sa “distrazione” de belle 5 miliardos de èuros – subra base italiana – dae su sistema de sos territòrios a favore de su bilantzu de s’Istadu.

Sas Provìntzias non sunt istadas abolidas, ma est istadu abolidu petzi su deretu de sos tzitadinos a nde seberare sos amministradores. E cun custu e cun sa distratzione de sos fundos, sunt istadas a manera forte ismenguadas sas capatzidades de interventu subra sa gestione de su patrimòniu edilìtziu iscolàsticu e subra sa manutentzione de su patrimòniu estremenadu istradale e de sos caminos chi a cussos entes torraiat cabu.

Cando nos naraiant (e nos narant e nos ant a nàrrere) chi “sas Provìntzias sunt caras e sunt una mitza de isprecu” s’ismèntigant a nàrrere chi sas tzifras elecandas a imbaru de custa tesi pertocant petzi una parte minore minore de cussas destinadas a sa parte polìtica e democràtica, ma sunt imbetzes riferidas a su muntone de cumpetèntzias chi fiant e sunt assegnadas a cussos entes.

A in ue cherent lòmpere? A su fatu chi sa lege regionale sarda – chi non si podet prus tocare pro more de su referendum – ponet a costàgiu de sa Tzitade metropolitana de Casteddu – àteras bàtor provìntzias: Sud Sardigna. Aristanis, Nùgoro e Tàtari. Dat a issas funtziones e ponet obietivos.

Ma prevedit modalidades de eletzione chi sunt a manera plàstica contra a su resultadu polìticu de su referendum e a su bentu chi est tirende: sos presidentes e sos amministradores provintziales, difatis, no ant a èssere votados dae sos tzitadinos, ma seberados intro sos amministradores comunales.

Unu pagu su matessi printzìpiu chi si cheriat introduire cun cussu aurtìngiu de su Senadu de sas Autonomias. A nde leare, duncas, a sos tzitadinos sa possibilidade de seberare sos chi depent amministrare e cun cales finalidades.

Deo creo chi siat pretzisu arresonare de custu, valutende sa possibilidade de pedire a su Cussìgiu Regionale de esplorare una cale si siat forma de dèroga autonomista pro custu paru de lege dannàrgia chi est cussa intitulada a Del Rio. No isco cales potzant èssere sos tretos pro bi traballare, ma a nde faeddare diat a mustrare chi sa classe polìtica no est surda subra sos sinnales chi lompent dae sa sotziedade.

Tocat de faedare de sa provintzia Sud Sardegna, sa etza provintzia de Casteddu sena sa Citade metropolitana. Est unu minestrone chi po como no torrat risposta a sos bisongios de sa gente. No est solu chistione de Carbonia o Isili.