(Per leggere l’articolo in italiano cliccare sulla bandierina in alto)

In su 2016 totus nois semus istados testimòngios de eventos chi sunt istados forsis premissas de una furriada verdadera pro s’isula nostra.

Sa visita de Xi Jinping, chi est s’omine prus de importu de s’Asia, est istada un’ocasione istòriga chi nos at abertu orizontes culturales e geo-politicos noos e chi nos at permìtidu de resonare subra de su datu chi non semper sa globalisatzione devet essere pro nois negativa ma chi podet essere a s’imbesse un’oportunidade de importu.

Pro custu diat essere unu machiore su de non profetare de is mercados in creschida de Moscòvia, India, Tzina (e paris cun i custa de totu s’Asia orientale), chi diant a podere acollire is “sarderias” prus o mancu de sa matessi manera cun sa cale nois amus finas a oe acasatzadu a is (pro narrere sa beridade prus a prestu grusseras) tzineserias de su de tres millennios.

Un’àtera novidàde de importu mannu est istada sa creschida de su turismu de crutzèra chi in is portos de s’ìsula at bidu in s’annu in pessu coladu prus de mesu milione de passegeros. Sa tendentzia pro su 2017 est sa de una crèschida a cudd’ala e custu est permitende.nos, a su mancu pro su chi pertocat Casteddu e is àteras tzitades portuales, de superare s’istòricu carcàngiu de Achille de un’economia de s’istranzadura chi dipendet tropu dae s’istagionalidade.

Custa est craramente un’oportunidàde de oro pro faghere connoschere s’ìsula a foras dae is tzircùitos traditzionàles. Ma chistionende de turismu ddu at un’àteru datu chi est finas prus positivu e chi est èssidu in is ùltimas chidas: un’indazinde de sa Banca de Italia e chi si riferit a is ultimos ses annos, mustrat chi Casteddu est sa megius destinatzione italiana pro su chi pertòcat sa satisfatzione reale manifestàda a pustis de sa visita a sa tzitade cunfromma a is isetos pretzedentes de su visitatore.

Totu custu est cunseguentzia crara de s’innorantzia o de sa sutavalutatzione de is ermosùras chi s’ìsula e mescamente sa capitale cosa sua òfrint, a campànnias de promovidura de sa RAS e dae àteros entes de impatu mediaticu debbiles (e chi pro custu diat tocare a mudare de manera detzisa) o, meda prus probabilmente, ambasduas is cosas. Ma su potentziale de creschida est abberu mannu.

Unu datu chi est pretziosu a sutalineare est chi a faghere a primos in custa classifica sunt is localidades chi, de manera traditzionale, sunt prus pagu visitadas dae is istràngios e custu cunfirmat su chi s’ischìat dae meda tempus: si intra de is isulas de su Mediterraneu sa Sitzilia e Malta tenent una fentomada mundiale sa Sardigna abarrat, mantendende a un’ala sa tradizionale costa ismeralda, pagu connota e, foras de su etzu continente, in parte manna disconnota o confundida cun àteros logos (comente cunfirmant is medas anglòfonos cando si riferrint a custa inditende.dda comente “the Italian Island of Sardinia”, de manera de donare a su mancu un’idea de s’area geografica in ue s’agatat).

Pighende in consideru totu custu su chi nos podimus pregontare est ite sensu tengat finas s’ipòtesi de una creschida de su turismu dae foras de s’Europa o de s’export pro esempru de s’artisanàdu o de s’agroindustria a foras de is mercados traditzionales, cando sa parte manna de su mundu non feti non connoschet is etzellentzias nostras ma innorat in totu s’esistentzia nostra matessi!

E non si resesset a cumprendere su motivu pro su cale totus is guvernos chi sunt sighidos is unos is ateros in carrera de Trentu in totus custas deghinas de annos apant manifestadu, ghiados dae unu provintzialismu a dolu mannu cronicu, un’indiferentzia o in is megius casos unu pagu consideru a bia a unu tema gosi tzentrale pro su tempus benidore nostru.

Tocat de manera evidente a si mòere in presse sighinde duas direttiva: abarolare su chi nos faghet ispetziales e alabare su chi nos faghet ùnicos, finas isfrutende internet che mediu de comunicatzione cun su cale difòndere de livellu globale su brand Sardigna, cun totus is etzellentzias suas (e sighinde a un’andala giai colada cun meda sutzessu pro esempru dae Nurnet o dae su situ meda meda populare “Ricette di Sardegna”).

Ca in sa sotziedade de sa comunicatzione, una realidade chene visibilidade mediatica virtualmente no esistet e custu est un’arriscu finas a oe finas tropu sutabalutadu ambos dae is politicos e dae is analistas e chi non nos podimus prus permitere de pigare. Cadaunu de nois traballet in su ruolu cosa sua e is istitutziones, mescamente cussas regionales, si facant intendere.