(Per leggere l’articolo in italiano cliccare sulla bandierina in alto)

 

Su vice- presidente de sa Regione Raffaele Paci – amparadu dae su trice- presidente Paolo Maninchedda – faghet ischire chi, pro sa prima borta, sas tassas de s’energia elètrica e de su gas (9 subra de 10 partes de su totale de cussu capìtulu) las at a incassare sa Regione in manera direta.

E, faghendeˑsiˑnde mannu de custa resessida, si bantat chi custu est unu resurtadu autonomìsticu bonu a beru pro sa Giunta de tzentru-manca.

A s’àtera ala s’ex presidente de sa Regione Ugo Cappellacci – chi pro primu aiat incurpadu sa Regione de s’èssere arressada in custa faina – a pustis chi l’ant naradu chi no est a beru, torrat a s’atacu mustrende documentos.

A pàrrere suo, si diat dimustrare chi fintzas a su 2016 sa Regione at semper incassadu cussas tassas in manera direta (e, duncas, si puru su datu esseret cunfirmadu, non bi diat èssere perunu resurtadu otentu dae Paci/Maninchedda) e chi, antzis, a bètia de totu custos annùntzios, dae su 1 de ghennàrgiu de su 2017 cussos incassos diant colare in Roma in antis de torrare a Sardigna.

Como, sigomente sas duas versione si gherrant a pare, unu de sos duos, Paci o Cappellacci, est imbolighende sas cartas e est narende una fàula a sos sardos.

Chie de sos duos esseret agatadu in grìmines – e creo chi sas cosas s’ant a acrarire in presse (e su sutiscritu un’idea si l’at fata) – si nde diat dèpere leare deretu sas cunseguèntzias. In unu Paisu sèriu si diat fàghere gasi.