(Per leggere l’articolo in italiano cliccare sulla bandierina in alto)

«Pro mezus, mezus; pro peus, mezus goi» nos naraiat babbu sa note de su 31 de nadale cando fiat intrende s’annu nou e fìamus totu sètzidos in tundu a sa banca apartizada.

Prus o mancu comente faghiat a sa matessi manera su “babbu” polìticu de sa Repùblica italiana cando in telebisione annuntziaiat un’annu nou càrrigu de isperas.

Dae paritzos annos a oe, peroe, deo sigo a fàghere sas matessi auras cun su matessi dìciu a sa famìlia mea, ma cun carchi duda si potzat abberare, ca dae sa telebisione su “babbu” polìticu de sa Repùblica italiana nos narat chi depimus sighire a fàghere sacrifìtzios e chi pro s’annu nou sas isperas non sunt bonas.

E puru, dae su momentu chi pagamus sas tassas sacrifichende sa parte manna de su traballu nostru, calicunu est festende cun su dinari nostru in banca bene aparitzada. Chie at a èssere?

Est festende innatis de totu su Guvernu nou de Gentiloni chi sa parte manna de sos cumponentes suos si sunt torrados a sètzere in su matessi cadreone chi aiant lassadu carchi die innantis.

Sunt festende sos bitze ministros e sutasegretàrios chi ant ocupadu sas cadreas pagu prus minores ma chi isperant una die o s’àtera de sètzere in cussas mannas. Sunt festende totu cussos portaborse chi sighint a mandigare dae sa matessi banca de sos ministros, bitze ministros e sutasegretàrios.

Andende a abbaidare chie sunt totu custos festadores, non bi cheret meda a cumprèndere chi sa parte manna de issos benint dae cussos poteres chi in Toscana, Emilia Romagna e, sighende manu manu, in sas àteras regiones ricas ant dadu su votu favorevole in su Referendum pro sa reforma costitutzionale.

At a èssere unu casu?

Sunt istupende ampullones de champagne pro s’annu nou fintzas sos atzionistas e sos “resparmiadores” de cussas bancas chi su Guvernu lis at postu a disponimentu 20 milliardos de euro de dèpidu pùblicu nou pro las amparare.

Unu muntone de dinari gasi mannu chi leamus matana a cantificare, ma chi cundunu rafrontu lestru podimus cumparare a tres bilàntzios de sa Regione Sardigna, chi ocannu at presentadu una finantziària de pagu prus de 7 milliardos de euro.

Si andamus a abbaidare chie sunt custas bancas aparitzadas de totu custu dinari, non bi ponimus meda a cumprèndere chi ant sede in cussas regiones ricas chi ant votadu a favore de sa reforma costitutzionale, in ue sunt residentes sa parte manna de sos ministros, bitze ministros e sutasegretàrios.

At a èssere unu casu?

Carchi ampullita la sunt istupende fintzas inoghe in Sardigna cussos chi ant retzidu sos incàrrigos pùblicos pro guvernare sos entes chi dipendent dae sa Regione Autònoma de Sardigna. “Cabutzones” chi sunt istados numenados dae cussos chi oe nos guvernant e chi sunt ligados a cussos ministros, bitze ministros e sutasegretàrios de sas regiones ricas, chi ant dadu su dinari a sas bancas e chi ant votadu a favore de sa reforma costitutzionale.

Paret un’isorvi-limba, ma sos contos torrant. In pagas paràulas, deo fato parte de cussu 73% de Sardos chi at votadu contra sa reforma costitutzionale, chi no at retzidu dinari dae sas bancas, chi no est istadu numenadu dae cussos chi nos guvernant e chi no est ligadu a ministros, bitze ministros e sutasegretàrios de sas regiones ricas.

E si in custu 2017 proèremus a bortulare o a fàghere unu isorvi-limba nou? Est a nàrrere: si nois faghimus parte de cussu 73% de Sardos chi ant votadu contra sa reforma costitutzionale, chi no amus retzidu dinare dae sas bancas, chi non faghimus parte de cussos chi oe in Sardigna nos guvernant, chi non semus ligados a ministros bitze ministros e sutasegretàrios de sas regiones ricas, ma chi semus sa majoria de sos tzitadinos; proite non proamus a andare a guvernare chentza fàghere peruna alleàntzia cun cussos chi oe nos guvernant e chi sunt ligados a ministros, bitze ministros e sutasegretàrios de sas regiones ricas chi dant su dinari nostru a sas bancas?

Be’, tando diamus pòdere sighire a nàrrere a sos familiares nostros, cun probabilidade chi s’abberet, «pro mezus, mezus; pro peus, mezus goi».

Ben’ènnidu 2017.