(Per leggere questo articolo in italiano cliccare sulla bandierina in alto)

Prenotende oe cun Ibèria pro su vèsperu de Pasca de Nadale, si ant a disponimentu chimbe volos dae Madrid a Palma (de sos cales unu a 38 èuros e duos a 6). Proade a prenotare Roma- Casteddu: sos postos sunt esauridos, zero volos sobrados.

Su sistema ispagnolu non preferit una Cumpangia, ma lu aplicant a totus a manera indistinta, finas a sas de volos baratos chi s’Assessore nostru de sos Trasportos no istimat. Custu at su significu chi b’at prus cuncurrèntzia in totu sas rotas e custringhet totu sos vetores a poderare sos prejos prus bassos. Proade a prenotare unu volu Ryan Air dae/pro Casteddu pro su 24: bi cheret unu mùtuo. Posca proade cun Madrid-Maiorca: 2 volos disponìbiles e ambos costant prus pagu de su Casteddu-Roma!!

Sa continuidade ispagnola balet dae cale si siat aeroportu natzionale e non petzi dae duas tzitades comente sa nostra. S’efetu làdinu de sa continuidade sarda est chi Alitalia (chi li faghent cada borta su bandu a mesura) nos custringhet a fàghere iscalu a Fiumicino pro andare a cale si siat logu.

B’at meda, ma meda prus volos dae/pro sas Baleares chi pro sa Sardigna, e custu no in tamen nois siemus meda ma meda de prus comente popolatzione (1,6 milones contra 1,1,).

S’aeroportu de Maiorca at unu tràficu aèreu de 23 miliones de passigeris cada annus, Casteddu si frimat a 3,7…
A bos pensades chi custu potzat fàghere sa diferèntzia in contu de isvilupu de su territòriu?
Sa continuidade ispagnola si balet finas pro su trasportu marìtimu, pro nois no esistit.

Dia pòdere sighire ma non chèrgio fàghere s’acabadore.

Sa pregonta est: chie nde leat profetu dae sa continuidade territoriale nostra? Sos sardos o Alitàlia?