Sighimus su biàgiu nostro pro iscobèrrere istòrias seletzionadas dae su giassu Oxygen 26, chi, cun su giornalista Nicola Ferrero, in sos meses colados, las at collidas in sos giassos internet de sas sotziedades chi sunt istudiende sas fronteras noas de s’agricoltura “possìbile”.

Las peoponimus a sa comunidade minore de letores de custu blog, in custa de bator puntadas, comente istìmulu a arresonare a s’informatzione.

Collida de datos a totu campu

Chi sa mesa in ue si giogat meda de su mercadu tecnològicu apat a ite bìdere cun sa collida de sos datos, s’elaboratzione issoro e a los rèndere disponìbiles, s’ischit. FarmLogs nd’est s’ìncarnatzione prus cumpleta in àmbitu agrìculu, pensada, de base, pro su clàssicu massaju americanu e tancas mannas meda. Su fatore chi la faghet ùnica e chi sos datos sunt collidos tràmite drones, satèlites e àteros sensores impreados in agricoltura: FarmLogs andat a forrogare intro sas mapas de Google, sos database de sos istitùtos meteorològicos, sos documentos de su catastu e sas fontes giai a disponimentu, sena installare in sos campos suos machinàrios de gastu mannu.

E su servìtziu suo est a sedatzare sos datos e a frunire a su cliente su chi servit: foto e analizos de sos terrinos dae su satèllite, resas a ètaru cumparadas cun sas stajones in antis, monitoràgu de sas pròinas, mapadura de sas incùngias, un’inventàru chi ponet in fatu sa sèmida dae su sèmene a sa bèndida. Totu custu in su telèfonu intelligente.

Sa versione Advantage isfrutat su GPS de su telèfonu pro registrare sas atividade fatas in sos campos e so datos sunt costoidos pro cumparatziones imbenientes.

In pagu prus de un’annu dae s’inchingiada sunt sitados collidos 10 miliones de dòllaros pro mandare a dae in antis su progetu.

At a èssere custu su tempus benidore de s’agricoltura intensiva?

(farmlogs.com)

Cungelare s’isprecu

Segundu un’istùdiu de sa FAO, su 40% de su màndigu produidu in sos Paisos in via de isvilupu non resesset a sighire su mercadu a cajone de sa gestione mala de sas incùngias e de sa mancàntzia de infrastruturas e de cumpetèntzias de sos massajos.

Unu de sos problemas prus mannos, mescamente in sas natziones cun temperaduras artas, pertocat sa dèbile o ausente cadena de su fritu. Comente fàghere pro addobiare sos bisòngios mescamente de sos produtores minores? Cun pianos mannos de educatzione e insignamentu e cun sa tecnologia.

Su Institute of Mechanical Engineers at medidu chi si diat pòdere transire su bator unu de sos isprecos pro more de sistemas de refrigeratzione atzivos.

In India, Promethean Power Systemsimpreat impreat s’energia solare pro infritare su late, mentres unu progetu de sa Universidade de sa Geòrgia impreat su biogas produidu dae cuntzime pro alimentare unu Sistema de infritamentu.

Su CoolBOT est una iscatuledda chi mudat un’impiantu cale si siat de conditzionamentu domèsticu in una mitza de fritu, imbassende sas temperaduras finas a -35°. Sa Dearman Engine Company, in fines, est isvilupende unu motore a pistones chi non produat emissiones e isfrutat s’àera licuida cara a sa sostenibilidade in sa produtzione de àera conditzionafa e de sistemas professionales de refrigeratzione.

(coolectrica.com storeitcold.com)