Pro Sardegna Possibile su votu de domìniga est istadu una risposta colletiva magnìfica a una riforma cherta dae su guvernu sena èssere cumpartzida dae su parlamentu e dae setores ampros de sa sotziedade tzivile, fata passare comente prioritària cunforma a tantas netzessidades ignoradas de sos tzitadinos.

Sos sardos non si podiant espressare de una manera prus crara: prus de su 72% de sos chi ant votadu ant naradu chi NO, sa pertzentuale prus arta otènnida in totu sas regiones.

Custu resurtadu espressat unu refudu netu de su disignu tzentralizadore de su testu de sa riforma costitutzionale e acrarit finas a ite puntu sos sardos punnant pro megiorare s’autoguvernu issoro, comintzende dae non chèrrere pèrdere cussu pagu de autonomia chi disponent oe in die.

Sos protagonistas de su votu sunt istados sos tzitadinos, pro ispantu de chie sighit pensende chi in polìtica giuant petzi sas siglas de sos partidos e unos cantos nùmenes de lìders. Sa mobilitatzione ispontànea de sos Comitados pro su NO, in ue ant traballadu paris pessones e positziones diferentes, est istada una de sas craes prus significativas e at dadu unu contributu determinante a chi bincherat su NO.

Sardegna Possibile est istada parte ativa in totu custu, pro un’issèberu polìticu de adòbiu e traballu comune. Cunsideramus una richesa manna s’esperièntzia vivida, e nos nde cuntentamus paris cun totu sos àteros protagonistas. Su resurtadu de su votu cunfirmat s’esistèntzia de un’ispàtziu polìticu alternativu ampru, cun sa mirada posta a manera detzisa a un’imbeniente de autoguvernu chi Sardegna Possìbile at giai sustènnidu in sas eletziones regionales coladas cun infinidade de pessones chi impreant sa retza.

A su presente Sardegna Possibile sighit traballende cun sos Comitados pro su NO pro propònnere paris una riforma de sa lege eletorale sarda, pro mèdiu de un’initziativa de lege populare chi podat garantire a sos sardos una rapresentatzione prus verdadera de sa voluntade polìtica issoro.

*Sardegna Possibile