Non semus meravigiados, ca sa fine fiat annuntziada.

B’aiat unu muntone de cosas chi s’ischiant dae meses.

Sa prima: s’aeroportu de S’Alighera fiat tecnicamente fallidu e cheriat privatizadu. Pro ite? Tropu dipendentes (sa matessi paristòria de cada azienda de Sardigna, cun sos orgànicos crèschidos dae sa polìtica), tropu sos costos e tropu pagos sos balàngios.

Galu prus pagu dae cando sa Giunta ghiada dae su Pd at detzìdidu de decretare sa morte de sa base Ryan Air, chi de s’aeroportu de su Nord Ovest fiat dae 15 annos sa bonaura. “S’Europa non permitet de sighire cun sa cumertzializatzione cumpartzida” – ant sententziadu su presidente Pigliaru e s’assessore Deiana, amparados dae sas ànimas fortes de su partidu – sena pensare chi in su restu de Itàlia sa pràtica est andada a dae in antis. In antis e a pustis de sa sentèntzia europea – galu segretada, mancu chi esseret su de 5 segretos de Fatima – chi puru paret chi apat apostivigadu chi sos aeroportos e sas Regiones semper e cando non si podent punire.

Sa de duas: totus naraiant e ischiant, dae meses, chi s’aeroportu diat èssere andadu a F2i.

Ite est F2i? Est ua sotziedade chi in su sistema aeroportuale italianu ischit a si nche mandigare totu.

Est unu fundu infraistruturale chi nche torrat a sa “Cassa Depositi e Prestiti” pùblica, a Intesa Sanpaolo, Unicredit e a unu grustu de fundatziones bancàrias, e in mesu de custas b’est fintzas sa Fundatzione de su Bancu de Sardigna.

“F2i Aeroporti” tenet su 70% di Gesac (iscalu de Napoli), su 54,5% de Sagat (iscalu de Torinu) e su 35,7% de Sea (aeroportos milanesos de Linate e Malpensa).

In mesu de sos cussigers de amministratzione b’est Antonello Cabras, ex presidente de sa Regione, ex senadore, oe presidente de sa “Fondazione di Banco di Sardegna” e capu de sa currente prus forte de su PD sardu. Su partidu chi dae duos annos e mesu est guvernende sa Sardigna, inclùdida sa polìtica de sos trasportos.

Augùrios a S’Alighera, a F2i e a nois.