Pro festare sa “Die Universale de sos Pitzinnos”, su 19 de santandria, a sas 11.30, in s’Istitutu cumprensivu 4, Iscola Primària de Sa Rodia, v. Cairoli snc, ARISTANIS, Diegu Corràine, Antoni N. Garau e Isabella Tore ant a presentare a iscolanos e maistros: sa Mustra “sos Deretos de sos Pitzinnos”, cumposta dae 7 pannellos de 100 x200 cm, cun testu in sardu e figuras a colores, chi illustrant 35 artìculos (de sos 54, in totu) de sa “Cunventzione Onu pro sos deretos de sos pitzinnos” de su 1989, ratificada dae s’istadu italianu in su 1991.

Sa Mustra l’ant a pòdere visitare finas sas pessones mannas, in oràriu iscolàsticu, su mangianu, dae su 19 a su 26 de santandria.

Sa CUNVENTZIONE PRO SOS DERETOS DE SOS PITZINNOS, chi est su tratadu internatzionale de deretos umanos prus ratificadu, istabilit sos deretos de sos pitzinnos, mescamente su deretu a sa vida, a sa salude, a s’educatzione e a su giogu, ma finas su deretu a sa vida familiare, a èssere amparados contra a sa violèntzia, a no èssere discriminados e chi sos àteros ascurtent sas ideas issoro.

In base a sa CUNVENTZIONE e a s’isfortzu de totu sos istados, s’ONU at istabilidu de promòvere e de festare sos deretos de sos pitzinnos in sa DIE UNIVERSALE DE SOS PITZINNOS, pro fraigare una sotziedade de amighèntzia, paghe, diàlogu e atzione in prode issoro.

Duncas, s’Assemblea Generale de s’Organizatzione de sas Natziones Unidas at istabilidu chi su 20 de santandria de cada annu siat sa DIE UNIVERSALE DE SOS PITZINNOS. Sa data isseberada currispondet a sa die chi s’Assemblea at aprovadu sa Decraratzione de sos Deretos de sos Pitzinnos in su 1959 e sa Cunventzione pro sos Deretos de sos Pitzinnos in su 1989.

Sa DIE est organizada dae sa Sotziedade pro sa Limba Sarda, sa MUSTRA dae PAPIROS editziones.