Su sìndigu de Casteddu Massimo Zedda, finas a proa contrària, est una persona de gabbale.

Si at atzetadu de si nche pònnere in sa passerella pre-referendum pesada finas in sa capitale de sa Sardigna dae su premier Matteo Renzi, at àere àpidu sas movitivas bonas suas.

Sa frimma de su “Patu pro Casteddu”, chi lompet a tres meses e mesu dae cudda de su “Patu pro sa Sardigna” (chi est giai mesu cugutzadu dae sa neula de s’ismèntigu) isperamus chi nde bàgiat su tantu a beru de sas missas cantadas chi amus a ascurtare in custas oras.

Mi paret belle iscontadu – finas si s’ispera est semper s’ùrtima a si nche mòrrere, sende chi l’amus intregadu sa patente de seriedade in comintzu de custu arresonu – chi Zedda in finitia at a dare su sustegnu suo a su Eja, apostivighende s’isposòriu intro sa cumponente sua de su giai isortu Sel e su PD rentzianu.

Isperemus chi Zedda apat pensadu a si nche amparare ca, dae sos documentos subra sos Patos in manu a sas Regiones, essit a campu chi sos fundos pro su Sud sunt in duda e finas ismenguantes: mancat unu pianu generale e sas cumpetèntzias operativas las ant atzentradas in Roma.

In su fundale – cun intritzu diferente cunforma a sas duas o tres inchingiaduras-passerellas de su Mater Òlbia, cun trassa pare pare intre Renzi e sos qatariotas – b’at a àere s’improsadura colletiva collegada a sa frimmada “tècnica” de su premier tzinesu in su sud de s’Ìsula.

Si isetant, in prus de caminos blocados, automobilistas arrenegados e isconchinadores curiosidados, Càmpei medas e una decraratzione chi non podet mancare – no ischimus galu si corpore praesenti o riportada a manera oportuna de relato – de s’òspite dadivosu pro su chi pertenet s’importu “istratègicu pro sos investimentos tzinesos de sas reformas de Renzi e de su referendum”.

Si cherimus est su matessi ischema porcheddinu chi amus bidu in su giardinu de sa Domo Arva. Obama chi tiraiat pro Renzi, e su premier giòvanu chi alabantzaiat e prenetaiat sa bìnchida pro Hillary. Totus ischimus comente est finida.

Mancu male chi, a bona sorte pro su premier cun sos ogros istrintos, in Tzina non sunt avesos a votare.