In s’agabbu de su mese de austu s’iscoberta chi s’Assessoradu a sos Trasportos – a cua – aiat firmadu una cunventzione noa cun Alitàlia, impinnendeˑsi a pagare un’assinnu de 1,6 milliones de èuros pro sos collegamentos agiuntivos garantidos in s’istiu de su 2016 in sas tratas Casteddu-Roma e Casteddu-Milanu.

Como, cun sa matessi publitzidade (est a nàrrere, nudda), su matessi assessoradu at istacadu un’àteru assinnu de 464.495 èuros pro Meridiana.

A bètia de sa cunventzione, chi comente totus ischint diat impònnere a sas cumpangias de aumentare sa frecuèntzia de sos bolos o impitare aeroplanos cun prus postos a disponimentu in sos perìodos chi b’at prus rechesta, sa Regione at pensadu de acansare sas rechestas – dae su puntu de vista suo legìtimas – de sa cumpangia presèdida dae Rigotti.

Tando, pro assegurare sa de tres rotatziones in Terranoa-Linate (chi Meridiana aiat naradu chi fiat pronta a bi renuntziare) in su perìodu intre su 1 de santandria de su 2016 e s’8 de ghennàrgiu de su 2017, e pustis galu intre su 1 e su 31 de martzu de su 2017, sa Regione at a gastare un’àteru mesu millione de èuros.

In s’agabbu de austu s’assessoradu – chi a s’ispissu si ponet comente difensore preventivu de sas cumpangias aèreas chi in sas tratas de sa continuidade òperant in sa base de su cuntratu chi est istipuladu tenende contu de unu bandu de gara regulare – aiat giustificadu s’atu faeddende de “netzessidades ogetivas ligadas a sa grandu rechesta chi b’est in sas tratas in ogetu”, narende in sustàntzia chi s’aumentu de sos bolos dae bandas de sos vetores si podiat pedire in manera istraordinària ma non sistemàtica.

Abbarrat su fatu chi, comente pro Meridiana, sa cumpangia at giai operadu cun sa de tres rotatziones in Terranoa-Linate pro totu s’istajone colada, sena costos agiuntivos pro sa Regione.

Ite at cambiadu ocannu?

E un’àtera pregonta: pro ite s’assessoradu est sighende a firmare atos agiuntivos cun costos a càrrigu de sas cassas pùblicas sena fàghere publitzidade comente si tocat?