Sa preneta est pro un’assemblea prena a càtzigu e caente, cussa chi s’at a fàghere pro arresonare in contu de s’aumentu de sas impostas de sas asseguratziones RC auto in su Sulcis Iglesiente; organizada dae sa Setzione Natzionale Agentes de asseguratzione – SNA – rapresentada dae su Presidente Paolo Bullegas.

In sa sala de su Cussìgiu Comunale de Santu Giuanne Suèrgiu, cras 16 sant’andria, a sas 15, nd’ant a arresonare sas fortzas sotziales sindacales e imprenditoriales, sos Assòtzios de sos consumadores e de sos Automobilistas cun su “determinu forte de frimmare su provedimentu ingiustu chi – narat Paolo Bullegas – agiuat a demare sa capatzidade econòmica de famìlias e impresas, e chi in capas at a inderetzare a s’evasione de s’òbligu assicurativu una fasca manna de tzitadinos chi sunt, est craru, in abbas malas econòmicas, cun pagu dinare, mescamente sos giòvanos”.

Leende a cunsideru su versamentu a su Servìtziu sanitàriu de su 10,5% e sas impostas noas de su 16%, sas asseguratziones RC auto, dae su 1 ghennàrgiu 2017 ant a èssere carrigadas a manera complessiva de su 26,5%, a su cale si depet agiùnghere su 2,5% pro su Fundu vìtimas de sas veturas.

S’aumentu de sas impostas l’at deliberadu s’Amministradore Istraodinàriu de sa Provìntzia Sud Sardigna noa su 27 santugaine coladu, cajonende sa chènscia de sos Agentes de asseguratzione, de sos automobilstas, de sos Assòtzios de sos consumadores e finas de sos Sìndigos.

Tostu meda est su chi at naradu Gianfranco Trullu, presidente de s’Unione de sas Comunas e finas sìndigu de sa comuna de Perdaxius, chi pedit a su presidente de sa Regione e a s’assessore de sos Entes Locales de meledare subra sa possibilidade chi s’Amministradore chi oe est in càrriga abarret galu in s’iscannu suo.

<Sa pressione fiscale – narat Trullu – at lòmpidu lìmites chi non si podent bajulare; a incrudelire galu de prus custu patimentu s’agiùnghet sa mesura ingiusta adotada dae sa provìntzia chi faghet dannu, pro s’ennèsima borta, in unu tessìngiu sotziale chi est giai a s’ùrtimu arrematu in contu de resurtos econòmicos-sotziales.

In angustia mala finas sas impresas. Elio Cancedda, coordinadore de su Movimentu Partitas IVA Sulcis Iglesiente, cundennat sena timòria su provedimentu <crudu e antidemocràticu>.