Adeboi ‘e unu mese da s’atobiu po presentare su progetu de Alternativa natzionale, in Bauladu sunt comintzadas sas dies de confrontu in sos territorios.

Cun Progetu Repùblica de Sardigna (ProgReS), chi hat crefidu sa die de oe, bi funt su Fronte Indipendentista Unidu, Gentes, Sardigna Libera e Sardigna Natzione Indipendèntzia.

Totus partios e grupos hant nau chi s’istrada est giusta e chi d’ogn’atera adesione – chi siet cunforme a sas cosas chi sunt ‘istadas nadas, cun piena alternativa a sos partios italianos – est bene atzetada.

In s’interventu sou Gianluca Collu, segretariu de Progres, hat faedau de sas dificultades de dies de oe: “B’hat 80 miza sardos no istuduant e no tribagliant. Amus su dovere de faedare cun issos e cun sos ateros sardos po lis proporre un’istrada noa, poninde a su centru sa Sardigna. Custa idea est aperta a totu sos Sardos, no solu a chie est indipendentista ma chi da indipendentista pensat”.

Gasi puru Bustianu Cumpostu (Sni), Cristiano Sabino (Fiu) e Gianfranco Sollai (Gentes).

Dae totus est ‘ennidu s’invitu a atobiare.

“Oe semus inoghe po faedare de unu caminu nou, chi faedet de unidade. Dae oe amus a andare in onzi comunidade po ponere raighinas fortes e faghere creschere unu cambiamentu forte”.