Galu calicuna ora e no isetamus prus. Pustis meses de campagna eletorale rebesta, “bruta” e mediàtica, sos Istados Unidos sèberant sa ghia issoro noa pro sos bator annos imbenientes.

Pustis sas diretas dae New York, Boston, Philadelpia, New London e Washington, semus inoghe a bos frunire calicuna “istrutzione” pitica pro s’impreu de sa direta Facebook e Twitter de custu note, subra su canale anthonymuroni.it.

Cantos votos servint pro bìnchere sas presidentziales?

Su sistema eletorale americanu est unu sistema indiretu, in ue su Presidente l’elèghent tràmite unu sistema collegiale chi assignat a onni Istadu unu nùmeru de “grandes eletores”.

Traduidu a pràticu, in onni Istadu su candidadu chi lompet su bonu de su votos si nche leat sos delegados, o “grandes eletores”, chi rapresèntant cussu Istadu.

Su nùmeru de sos delegados pro onni Istadu est determinadu cunforma a sa popolatzione, e podet mudare dae 55 de sa Califòrnia a sos 3 de su Wyoming, de s’Alaska o de su Sud Dakota, cun sa diferèntzia de importàntzia chi nde protzedit.

In totale, sos delegados sunt 538 e pro bìnchere, su candidadu nde devet otènnere nessi 270.

In totu sos Istados, francu su Maine e su Nebraska, b’at unu sistema chi li narant Winnertakesall, cun su cale finas unu votu detèrminat sa bìnchida de unu candidadu o de s’àteru e a in ue andat sa totalidade de sos delegados.

Custu cheret nàrrere chi pro bìnchere, su candidadu non depet a mala bògia leare su bonu de so votos complessivos, ma su bonu de delegados.

Totus connòschent su casu de su 2000, cando George W. Bush aiat bìnchidu su democràticu Al Gore sende chi aiat balangiadu mesu miliones de votos in mancu.

S’importàntzia de sos Istados Pendentes.

In custu arresonu, ant un’importu de fundamentu sos Istados Pendentes, chi est a nàrrere sos istados chi non pèndent in totu nè a sos democràticos nè a sos republicanos, ma in ue ambos sos partidos ant sa possibilidade de bìnchere.

Sende chi unos cantos istados – che a su Texas e Utah pro sos Republicanos, Califòrnia, Washington, New York e Maine pro sos Democràticos – ant àpidu semper in s’istòria un’ischieramentu polìticu pretzisu, sos Istados Pendentes ant un’importu de fundamentu e sunt finas sos Istados in ue sos candidados gastant de prus pro sas campagnas eletorales.

Pro su chi atenet imbetzes sos Istados Pendentes, chi ant èssere finas sos istados de bardare cun atentu sa note de sas eletziones sunt in primis Colorado, Florida, Iowa, cun in fatu Michigan, Nevada, New Hampshire, North Carolina, Ohio, Pennsylvania, Virginia e Wisconsin.

Votu antetzipadu.

Su tres unu de sos eletores aiat giai votadu prima de s’apuntamentu de oe. In sos Istados Unidos difatis est possìbile, e finas normale, a votare dae 45 dies a 4 dies in antis de sa Die de sas Eletziones – cun sa punna de fatzilitare siat a sos Istados sa gestione de su votu, siat su votu a sos eletores.

Sos votos antetzipados ant èssere iscrutinados paris cun sos àteros s’8 santandria. Finas a cussa data, custa tècnica la leant a cunsideru che a una manera pro medire su cumbinchimentu pro su chi atenet sas eletziones, e duncas s’afluèntzia dàbbile.

Pro como ant votadu nessi 37 miliones de persones e dae custas, chi parent democràticas pro su prus, paret chi essat a campu su fatu chi pro Hillary est traballosu meda a achirire nieddos e ispànicos.

Informatziones de profetu pro sighire sas Presidentziales.

Su resurtadu de sas eletziones at a èssere craru facas a sas 5 de chitzo, oràriu italianu, de su 9 santandria.

Cando custu at a costare, ambos sos candidados ant a faeddare, su binchidore pro declarare sa bìnchida e s’àteru pro amìntere sa derrota.

Sos risultados ant a èssere ufitzializados in su Senadu su 6 ghennàrgiu 2017, mentres su presidente eletu s’at a aposentare in sa Domo Arba e at a leare de fatu s’iscannu de Barack Obama a sas 18.00 oras italianas de su 20 ghennàrgiu, cando s’at a faghere Sa Die de Inchingiada.

Dae su 1965 su candidadu chi at bìnchidu in Ohio est semper divènnidu su presidente de sos Istados Unidos.

(leghe finas in http://www.fanpage.it/presidenziali-usa-2016-grandi-elettori-voto-anticipato-e-swing-states-la-guida/)