Est nàschida in Sardigna sa prima bursa ètica de su trigu

Sa Retza de Filiera de su trigu ruiu coltivadu e traballadu in Sardigna (Sardo Sole) at dadu a ischire e presentadu sa bursa ètica de sos laores in Sardigna, chi est che a una piataforma in lìnia pro favorèssere, subra bases èticas, s’addòbiu intre sa dimanda e s’oferta de trigu ruiu sardu.

In s’intentu de sos fundadores, sa bursa ètica acumprit una funtzione a duos pìgios, sa, a una banda, de isparghinare a manera trasparente sas polìticas agràrias de sa filiera in cunforma a sos produtores e, a s’àtera, de ismanniare s’impreu de su trigu sardu dae banda de sos trasformadores regionales favoressende s’addòbiu intre sa dimanda e s’oferta subra bases èticas e valores cumpartzidos.

Sa punna disigiada est sa de favorèssere un’impreu prus mannu in sos protzessos de trasformatzione de sos produtos chi protzèdint dae su trigu ruiu de matèria primàrgia coltivada in Sardigna, a tales chi si permitat a custos trasformadores de si distìnghere in su mercadu cun una sèmida de tratzabilidade mera ponende a disponimentu de issos etotu sos elementos immateriales chi sa filiera at a disponimentu comente sos chi si nùmenant inoghe a dae in antis (logo istitutzionale chi garantit su 100 % de trigu sardu e partetzipatzione a su tzircùitu borsìsticu).

Elementos de novidade sunt sas pagas, simples ma craras règulas èticas chi piessinant custa piataforma, sas tipologias de trigos cuotados, sa creatzione in intro de unu tzircùitu ad hoc pro sos laores antigos, sa polìtica de trasparèntzia posta in campu in cunforma a su produtore e a su consumadore de finitia.

Gasi comente innovativas sunt sas règulas pro sa formatzione de su prètziu chi intregant a sas organizatziones agrìcolas de sa filiera sa tarea, fata chi siat s’incùngia, postu su sobradu a campu, de formulare ipòtesis de prètziu\cunventziones de frunidura pro su tzircùitu èticu creadu de reghente.