B’at de si pònnere in oriolu pro cantu bidimus cada die, tantu chi parimus intro una pellìcula in ue semus atores e reos.
Che a su male fàghere de is tifosos de su fùbalu – dae is ultras in sas gradinadas de su istàdiu fintzas a cuddos chi a fitianu s’agatant in sos tzilleris o in sas giassos de is “social network” – aderentes de partidos polìticos, betzos o noos chi siant, parent interessados a sa partida, a sa calidade de su giogu, a s’onestade de sa proposta e a su mèritu de su contu.
Contat isceti su risultadu finale. A bortas mancu cussu. Est a nàrrere chi est prus de importu a si mustrare alleados, infamende s’iscuadra contrària.
Mancari nega nega veridades ladinas fintzas a si mustrare surdos e tzegos. Totu benit ingullidu e totu paret cunsentidu.
A sa lista de infados torrados unu a s’àteru e ofesas, chi giai sas duas alas de s’iscenàriu polìticu italianu nos aiant abituadu, si devet annànghere s’inchietu mundu de su movimentu identitàriu sardu.
Movende da custu càmbiu de cussèntzia de su bìvere a manera tzivile, s’idea de bene pùblicu e non cussu riferidu a chie amministrat sas istitutziones, podimus bìdere particulares e interessadas ecuatziones lògicas.
Si chistionas cun unu de manca o destra, ses prontu a ti bèndere, si chistionas cun unu indipendentista ses cun s’idea de collire s’eredidade o a ti mustrare che capu, sena chi nemos ti promovat pro cussu rolu.
Cale est s’idea? A fàghere bìdere chi s’iscuadra tua non si podet discutere e chi a custa totu si devet perdonare, isgarbos a s’ùrtimu òmine o fatos intro a s’àrea de rigore e sas ofesas a sos àrbitros. Ma prus de importu est sa vitòria. E si nono sos tres puntos los ant a pigare sos aversàrios.
Ma sa polìtica no est cosa de campu de fùbalu. Sa polìtica bivet de cunfrontos abertos e chena làcanas postas dae tirannos chi mai bolent pèrdere su poderiu issoro de tramite.
In Sardigna su cunfrontu no est a duas alas ma abertu a ideas meda pro su benidore.
Onniunu devet èssere lìberu de si seberare su suo, chena prus firmare dèlegas prontas.
Tocat a castiare programmas e chie los ponent a campu. Est agabbadu su tempus de sas cramadas a fede.